16 jun. 2018

Últimas sesións deste curso

Recordatoooorio!

O luns 18, no segundo recreo a sección do alumnado de menos idade -e calquera outro/a que queira vir-: comentario de La cruzada de los niños.

O mércores 20, no segundo recreo, xuntanza xeral do alumnado membro: peche das actividades deste curso, con algunha sorpresiña.
O venres 22, á hora de xantar, como vén sendo habitual, a sección de adultos tamén se reúne para ter a última xuntanza deste curso. Falaremos das obras que temos pendentes de comentario e estableceranse as lecturas de verán... hum... xa hai varias propostas deliciosas...


11 jun. 2018

O tempo vaise, as lecturas quedan

Ao borde xa de rematar o curso, damos breve noticia dalgunhas actividades feitas neste último trimestre: rematamos maio coas lecturas no CEIP de Quiroga e no CEIP de San Clodio por parte do alumnado deste Club de Lectura (podedes ver as imaxes nestes enlaces ao facebook do centro onde se colgaron).
As lectoras e os lectores da sección do alumnado, participaron activamente en distintas propostas de "Abril de libros, maio de letras", ás que se fai referencia no blog da biblioteca máis polo miúdo. Iso si, unha das actividades estivo dirixida moi especificamente a eles/as: o encontro con Marilar Aleixandre, que visitou o noso centro o 3 de maio para falar dos seus libros. Aquí deixamos algunhas imaxes desa actividade (tamén houbo un encontro posterior coa sección de adultos de Libromanía, co habitual xantar de comentario):



12 abr. 2018

Atención: collede tod@s o voso libro!

Veñen tempos que requiren telos na man...

A vindeira semana faremos Lecturas nos coles de Quiroga e de San Clodio: iremos lerlles contos e poemas aos nenos e nenas de infantil e 1º de primaria. Xa escollestes o voso texto?
Ademais, dende aquí animámosvos a participar no desafío "E ti que les?": facédevos fotos lendo ou facédellas a outros lectores/as para montar un mural con todas. Ide pensando o libro co que queredes retratarvos!
Aquí deixamos unhas do alumnado de 4º nunha Hora de Ler adicada a Manel Cráneo.
Que estamos a ler en Libromanía?
Despois dun tempo sen dar sinais na rede, facemos un pequeno recordatorio do que fomos lendo dende finais de xaneiro: os máis noviños leron El autobús de Rosa (e comentámolo á volta da Pascua) e agora imos con La cruzada de los niños; a rapazada de 3º da ESO en diante anda viaxando con Leo en Destino Xalundes, e xa houbo tres xuntanzas para falar del.
A sección de adultos ten pendente comentar A arte de trobar, de Santiago Lopo e Manual de instrucciones para mujeres de la limpieza, de Lucía Berlín. Caerán para a semana, humm...


6 feb. 2018

Da viñeta á mesa

Como xa saberedes por Biblioquiroga, para conmemorar o Día da Ilustración estivo entre nós Manel Cráneo, para facer un obradoiro con parte do alumnado da ESO. 
A súa visita permitiunos aproveitar tamén para que unha parte do alumnado do Club de Lectura lle fixera unha entrevista previa: un material de primeira para a segunda edición de "O Eco do Val", que sairá en abril.

Para rematar a xornada, Xabier e Manel Cráneo xantaron coa sección de adultos de Libromanía. A sobremesa deu para facer intercambio de recomendacións lectoras -entre outras lerias varias-, coñecer os últimos proxectos do ilustrador e editor, e comentar algunhas das súas publicacións. 

E falando de "O Eco do Val"... neste enlace podedes ver un artigo que reseña a nosa actividade: en concreto a xuntanza de comentario de Al sur de la alameda, feito por Emily González.

16 ene. 2018

Semana de xuntanzas

Recordatorio aos lectores e lectoras das datas de comentario das obras pendentes:
- o mércores 17 haberá o xantar laretada lectora da sección de adultos, onde degustaremos  No llorar, de L. Salvayre, algún libro/antoloxía de Gloria Fuertes, e A memoria da choiva, de Pedro Feijoo. Se alguén aínda non botou o conto de La uruguaya, de Pedro Mairal e Instrucións para tomar café, de Núñez Singala, tamén terá ocasión: revisitarémolas, que na última xuntanza houbo moitas ausencias...
- o xoves 18 no 2º recreo @s máis nov@s falarán de Charles Darwin, de  Alan Gibbons
Presas fáciles, de Miguel Anxo Prado non ten data fixada aínda, pero contade que será a comezos da vindeira semana, o luns ou o martes.
Tede en conta que, coma sempre, decidiremos as próximas lecturas tamén nestas xuntanzas. Non esquezades traer algunha apetitosa proposta...

29 dic. 2017

Sesións que levou o vento

Sempre ás presas. Non houbo maneira de comentar Charles Darwin, de  Alan Gibbons e Presas fáciles, de Miguel Anxo Prado antes do Nadal, así que quedaron para a volta as sesións de comentario destas dúas obras de lectura para a rapazada. Os recreos en vísperas de avaliación son tempos difíciles...
No que se refire aos adultos, reunímonos o 22 de novembro para comentar El lector de Julio Verne, de Almudena Grandes, e os Contos de Edgar Allan Poe. E o 13 decembro falamos de La uruguaya, de Pedro Mairal e Instrucións para tomar café, de Núñez Singala. Quedamos de ter lidos para mediados de xaneiro No llorar, de L. Salvayre, algún libro/antoloxía de Gloria Fuertes, e A memoria da choiva, de Pedro Feijoo. 
Queda aquí unha imaxe de cando nos xuntamos para falar de Al sur de la alameda, o 22 de novembro.  Tivemos a sorte de picar algo moi, moi dóce, a proposta de Nelson, profe de inglés que ten orixe familiar en Chile, onde estaba ambientada a historia. Rematamos o evento recitando en francés o poema "Couvre-feu" de Paul Éluard, citado no libro de Lola Larra e Vicente Reinamontes.


20 nov. 2017

Por fin... Al sur de la alameda!

Recordatorio para lectores/as xuvenís: mañá no segundo recreo, en audiovisuais comentamos Al sur de la alameda. Non esquezades vir, que xa sei que o devorastes ben. Aproveitaremos para dixerilo en grupo con algún outro produto gastronómico.