Celebración do Día da Paz

Onte houbo varias actividades para conmemorar o Día da Paz e promover actitudes e comportamentos non violentos, unha delas, un recital poético no que se deu lectura a composicións que falaban de abusos, violencia, guerras, intolerancia e actitudes pouco solidarias que todos debemos evitar, estivo organizada este Club de Lectura e contou coa presenza activa do alumnado de bacharelato e 4º da ESO.
Tamén houbo lugar para a esperanza con carteis realizados polo alumnado de distintos niveis, promovendo a súa realización dende distintos departamentos.
Moitas grazas a todos e todas pola vosa colaboración e participación.
En breve, poderedes ver aquí as fotos.

Lembrade que mañá temos unha nova xuntanza

Nas profundidades...

Na última xuntanza baixamos ás profundidades do mar coa obra de Miguelanxo Prado, que nos deixou bastante impresionados, polas imaxes e polo argumento, fantástico e tráxico, pero cheo de beleza.

Ademais de comentar De Profundis, verdadeira xoia gráfica que encheu de mar os nosos ollos, na última xuntanza deste Club de Lectura falamos de próximas lecturas, e programamos a periodicidade de reunións quincenalmente. Mirade neste blogue ou no taboleiro a carón da biblioteca para saber as actividades que se realizarán en cada ocasión.

Para a/os que teñades interese en participar na elaboración do blogue, estará aberto ás vosas colaboracións os luns no segundo recreo, na sala de audiovisuais.

Por certo, xa que tamén estivemos a falar da última obra de Miguelanxo Prado, Ardalén, publicada recentemente, aquí queda a portada correspondente á edición de El Patito Editorial (en galego); en castelán sae en Norma Editorial.

Trátase dunha obra extensa, que aborda o tema da memoria e que vai máis alá do que é un cómic, segundo o autor, quen traballou a reo nela durante algo máis de tres anos. Se queredes máis información, podedes consultar na rede a páxina web do autor.

De novo unidos polos libros

Recórdovos que o próximo luns, día 14, no segundo recreo, terá lugar a xuntanza para comentar De Profundis, adiada dende antes do Nadal.
No seguinte enlace podedes visitar a páxina do autor, Miguelanxo Prado, que non ten desperdicio. Tamén aquí podedes disfrutar da versión animada deste relato.

Lecturas para os adultos

As obras de lectura seleccionadas polos adultos foron: El enredo de la bolsa y la vida (Eduardo Mendoza), Sunset Park (Paul Auster) e Misión Olvido (María Dueñas). Xa podedes ir empezando...

17/12/2012
Queridos lectores e lectoras de Quiroga:
Por razóns alleas á nosa vontade (exames e outras probas previas á avaliación) temos que pospoñer a xuntanza para falar de De Profundis, prevista para hoxe. Para que todo o mundo estea máis relaxado, ímola deixar para a volta das vacacións (xa avisaremos da data). Acordádevos de devolver os libros.
Pasade boas festas e lede moito.

Déixovos aquí unhas imaxes
do noso taboleiro, onde
estamos a facer un mural
de acrósticos cos nomes
dos membros do club.

Estes somos nós

Aquí saímos algúns dos lectores do IES de Quiroga, aínda que non estabamos todos e todas, porque os virus e outros males do outono fixeron das súas esta semana.
Lembrade que mañá haberá un taller de acrósticos, no que podedes participar todos os que queirades, na aula de audiovisuais, no 2º recreo.

Estas son as propostas que achegaron os adultos, entre estas obras escolleranse tres para ler ó longo do curso. As votacións están tendo lugar esta semana. Que vos parecen?
Animádevos a facer algún comentario sobre as que coñezades, para axudar ós indeciso/as.

Primeiras lecturas

Xa se están repartindo os exemplares do primeiro libro para a rapazada:  
De profundis, de Miguelanxo Prado, unha verdadeira xoia, tanto polas súas ilustracións como polo argumento engaiolante.
 Podedes recollelos falando coa coordinadora do Club de Lectura, Eva Teijeiro.

O vindeiro luns 12, no segundo recreo, hai unha xuntanza para todos aqueles que estedes interesados en participar nesta actividade, ou queirades saber máis do seu funcionamento. Achegádevos á aula de audiovisuais, que haberá moito máis que palabras.


As lectores e lectoras da sección de adultos teñen de prazo ata o luns para propor un par de obras para ler, porque ó longo da próxima semana terá lugar a votación para escoller entre esas propostas.