Comezamos de novo

O pasado mércores 27 tivo lugar a reunión de presentación do Club de Lectura este curso, na que se falou das actividades previstas e se explicou o funcionamento de Libromanía para o alumnado novo que tiña interese en participar. Houbo quen non puido ver, e xa mandou recado...

O próximo venres, no 2º recreo, poñeremos en común as nosas propostas lectoras e comezaremos outro puzzle de libros. Non volo perdades!!!

Sobremesa lectora ao carón do río

Pois si, a xuntanza da sección de adultos tivo lugar en San Clodio desta vez, moi pretiño do Sil. Combinaba perfectamente co relato de Todo isto che darei, e as súas esceas de ribeira -nese caso do Miño-, sobre o que houbo comentarios diversos pois non todo o mundo ficou enfeitizado pola historia, aínda que a impresión xeral era boa. Máis unanimidade suscitou Corredora, ese libriño que conta tan ben a peripecia vital nunha atleta etíope, e ao mesmo tempo vai deixando caer faragullas de grandes temas contemporáneos.

A data permitiu que fosemos máis dos habituais (como podedes ver na foto que nos sacou unha nai) e tamén os nosos convidados/as fixeron as súas propostas de lectura, por iso saíu unha boa rea delas, moi variadas. As inmediatamente seguintes son El lector de Julio Verne, de Almudena Grandes, e unha antoloxía de contos de E. Allan Poe.

 Ah... o misterio agora que reven os días, acae tan ben...

Setembro de libro

O verán de lecturas vai quedando atrás, agora é o momento de dixerilas...

Para iso, a sección de adultos, que non ten repouso, reúnese este mércores 6, cunha boa sobremesa: Todo isto che darei, de Dolores Redondo e Corredora, de María Reimóndez. E xa sabemos cal será unha das próximas lecturas: El lector de Julio Verne, de Almudena Grandes que nos recomendou Mini.

A rapazada polo de agora aínda está devorando por libre... pero logo comezamos tamén a falar de novas lecturas para este curso.
Talvez sexa esta vez unha dobre viaxe...

No verán... lerás máis

Queridas lectoras e queridos lectores:
Non esquezades devorar con ansia canto libro de interese pilledes no verán. Aproveitade que temos máis tempo de lecer, e máis horas de luz natural... por non falar dos entornos naturais como xardíns e praias, que tanto favorecen a lectura... (e as esperas nalgunhas viaxes, que non son agradecidas, pero permítenos bucear entre páxinas!).

Pola nosa conta, déixamosvos algunhas recomendacións no último biblioletín.
A sección de veteranos/as do Club de Lectura non descansa: estamos lendo El corazón es un cazador solitario de Carson McCullers e Corredora, de María Reimóndez. Contamos comentalos cara a mediados de xullo, con algún produto gastronómico á altura da ocasión ;-)

X Xornada dos Clubs de Lectura de Galicia

O pasado sábado día 17 de xuño, tres alumnos e unha profesora do IES de Quiroga, asistimos a unha xornada no Pazo de Congresos de Santiago de Compostela, na que se reuniron varios clubs de lectura de diversos centros de ensino de toda Galicia.

A xornada comezou cun espectáculo de animación, seguido de diversos obradoiros nos que participaron alumnos e mestres.

Nos asistimos ao obradoiro de Radio Somerxida, con Luís Pardo , que consistíu na simulación dun programa de radio en directo, comentando o que estaba acontecendo no Pazo dos Congresos nesa xornada; tamén acudimos ao obradoiro de Versos en Pegatina, con Antía Otero, no que aprendimos a mirar doutro xeito as palabras.

Despois chegou a hora de xantar, que foi un pouco peculiar, xa que contábamos cuns vales que íamos cambiando por apetitosa comida no exterior do Pazo. Os xeados foron o mellor, pois facía moita calor.

Para facer a dixestión, aproveitamos para comentar libros con outros clubs de lectura (no noso caso co do IES María Soliño, de Cangas).

Chegando xa ao final, tivemos un encontro moi interesante e divertido co recoñecido escritor de novela xuvenil César Mallorquí.

E o remate da xornada estivo amenizado por un concerto de Xabier Díaz e as Adufeiras do Salitre.

Despois deste caluroso e entretido día, collemos o autobús de volta a Quiroga.

Alberto Losada (4º ESO)

Miguelanxo Prado, premio dos Clubs de Lectura 2017

O grupo de lectores/as que compartimos camiño cara a Santiago: Clubs de Lectura do IES de Quiroga, do IES Cosme López Rodríguez (A Rúa) e IES Río Cabe (Monforte).

E repetir o conto!

O xoves tocoulle ao alumnado do CEIP de San Clodio ter uns lectores e lectoras de contos (e poemas!). Aquí quedan estas imaxes que demostran o ben que o pasamos:

Ler para outros/as

Aquí andamos aínda, preto do verán e das vacacións, que é o mellor tempo para ler!!!

A sección do alumnado anda un tanto desbordada de probas e traballos a final de curso, e decidimos non ler obras para facer comentario conxunto; iso si, participou activamente en varias das propostas de "Abril de libros, maio de letras": hoxe, por exemplo, parte do noso alumnado lector acudiu ao CEIP de Quiroga para lerlles uns contos e uns poemas aos nenos e nenas de infantil. Resultou unha experiencia moi boa e quedamos en volver para o vindeiro ano. Mañá repetirase a actividade, con outros lectores/as, esta vez no CEIP de San Clodio. Nestas imaxes podedes ver que ben foi todo:

A sección de adultos/as continúa co seu programa de lecturas, e despois de comentar o mércores pasado Patria de F, Aramburu e Presas fáciles de Miguelanxo Prado, establecéronse como seguintes propostas El corazón es cazador solitario, de Carlos McCullers e Corredora, de María Reimóndez.

Tamén fixemos unha xuntanza a maiores das de comentario, aproveitando que andaban por estas terras X. Estévez e a súa dona, Maribel, membros honorarios deste Club de lectura.